Servizi
Contatti

Eventi


Da poco, xe entrà in circolassion un bel libreto de poesie in lingua del dotor Giovanni Sato, un zóvene specialista nel curare la vista, padovan ma operante ne l'ospedale de Montebeluna (Treviso): Intonazioni. Se trata de sinquanta poesie, la magior parte curte, na spece de picoli sbufi de aria fresca, supià in facia có te si nel mezo de la stajon calda, un'aria linpida che se confonde co la luce, tanto xe ciaro el senso de le parole che le se porta drento na grazia, un sentimento persuasivo e discretamente amorevole.

El linguagio de Giovanni Sato xe come na man delicata, na man putina che caressa le robe pi bele che el Creatore ne ga dà a gratis: la natura, el sole, l'alba, el tramonto, la piova, el vento, la brosema e la luce, tanta luce, al punto che el poeta de'e volte se sente stordìo, intontìo de luce. Ma anca de amore. E nel sogno fato a oci verti, magari de matina presto andando al lavoro, co xe drio svejarse la tera e la natura, nasse come un cantico, un salmo, un ino a la vita, al bisogno de spiritualità e de cielo: nasse la poesia de l'essere.

Eco parcossa sti versi i xe traversà in longo e in largo da un sotofondo de musica che te vien incontro ne'a letura fin da'e prime poesie, te conpagna fin in fondo e te fa sentire lesiero, come "farfala". Poesia che te penetra come na frase cara, dita in dialeto.

Recensione
Literary © 1997-2024 - Issn 1971-9175 - Libraria Padovana Editrice - P.I. IT02493400283 - Privacy - Cookie - Gerenza