|
| |
La stanza alta dell'attesa, tra mito e storia
On vero “caleidoscopio” de ricordi, sentimenti, persone e tenpi del
miracolo e del spetare, stando a la finestra de l’umanità, sperando de védar
rivare la nova vita, sognà, desiderà fin da l’infanzia.
Xe stà questo el desiderio e el risultato de sto lavoro leterario de
straordinario valore de Maria Luisa Daniele Toffanin, scritrice e
poetessa padovana che, parte in poesia, parte in prosa poetica, la ga realizà,
come regalo a i so genitori Lia e Gino. In realtà el libro porta onore a
l’autrice stessa, a la so cità, la Padova del dopoguera, a l’amicizia senza
tenpo e a la storia. Sì, anca a la storia, parché la Storia xe fata de tuti sti
pìcoli o grandi avenimenti che, se no i vegnesse racontà, la restarìa inconpleta.
 Eco alora el significato de sto lavoro autobiografico, La stanza alta
dell’attesa (Valentina Editrice, Padova, 2019, nota introdutiva de Luisa
Scimeni di Sanbonifacio, prefazion de Stefano Valentini, comento de Nazario
Pardini e Mario Richter; 144 pagine, 15,00 Euro).
Con l’eleganza de linguagio e la liricità poetica, proprie de na
scritrice de “provata misura”, Maria Luisa la fa rivìvare persone, loghi,
circostanze felici ma anca triste da ricordare parché no le se ripeta: tuto on
mondo che, chi resta, ga da conóssare parché el presente el sia manco òrfano del
passato.
Cussì ne la memoria de l’autrice salta fora anca na sità d’altri tempi,
co strade, boteghe, avenimenti, personagi visti da la “terrazza al n. 15” de via
Gabelli o incontrà, girando par le strade vicine (e “consentite”): la famosa
Gaetana, l’omo del giazo o del fero vecio, le giostre in Prà de la Vale…
Tra le pagine, riunìe ne le quatro sezion, quanto respiro de tradizion e
del modo de vìvarle, ormai sconparsi: san Piero in barca co la ciara de ovo t’on
botilion o te na carafa, la preparazion del Presepio, l’ansia ne la note de la
Befana… Quanta nostalgia spetare che riva la sfilata de i cari de Carnevale, la
gita in bicicleta su i nostri Coli Euganei el Luni de Pasqua…
Che belo risentire el senso de la fameja, con tuto l’amore e l’acordo tra
mama e popà, na volta superà el dificile momento de la tragedia de la guera.
Quanta amicizia vera tra le varie persone, quando on gnente vegnéa spartìo tra
tute.
Se rivela molto utile e interessante l’elenco finale de i 95 nomi de le persone
che se incontra ne le poesie e ne le prose del libro, con i dati anagrafici e
storici de la singola persona. Pensemo de poder dire che, dopo l’inpegno per
realizare i so 21 libri, publicà dal 1998 al 2019, questo de La stanza alta
dell’attesa el xe de sicuro quelo pi soferto e pi inpegnativo: on lavoro de
scavo e de risserca ne la miniera de la propia anima, par ritrovare la piera
preziosa del so èssare “persona pensante”, umana, viva, inpegnà e senpre “in
attesa” de on futuro pien de emozioni, de speranze e de gratitudine al dono de
la vita. (Mario Sileno Klein)
| |
 |
Recensione |
|
