La Nogara granda

Vincitrice del primo premio
al Concorso “Poesia di Primavera”
Chirignago (Venezia)

La gera na maraveja de la natura
co 'l so core grando de bona mare, na mare nona,
co la so mana de grassia
par do fameje, par tuto l’ano.
La gera là anca co le do cognàde da poco maridà,
tacae de casa, 'sta casa longa, spartìa in dó,
le rasentava en tea mastèa dea lìssia
i strassi de pianti e sangue de na mala guera intrigà da mati
che tante vite ligà a noaltri se ga portà via par senpre.

Da pì de zento ani la gera là, e anca oncò, el dì de San Piero,
cargà de tante nose garbe, che de pì no se podea,
La gera là, fin le oto de matina,
co la ga tacà sensa pietà la menàra de i paroni novi,
par farghe posto a la smania de grandessa de 'sti siori.

'Desso le so raise fonde e spante fin drento el core de la Tera
le xe scoerte, verte cofà brassi desperà
e i so cavei spezià de acquarzente che sa da bon
i xe desfà, mastegà da i feri de le ruspe
e po mucià de sòra de le piere, butà sol calto,
tute le sope rebaltà le xe bagnà de le so lagreme
che pianze on profumo cruo che 'l sbrusa in gola.

I ga copà na pianta che ghe ne gaveva viste tante
e tante ne savea.
La gera gnaro e quèrto par i osei e giostra pa' i putei
co ea dindola picà soto l'onbrìa, che de istà no la spassava
gnanca la forca de 'l sol lion.
Xe stà copà la guardia santa de la casa
na mama bèla che te meteva in brasso na fortuna de fruti tuti i ani
ca te fussi stà bravo e bon
o bon da gnente.
La xe na morte ingrata, ingiusta, iriguardosa
che ciama la malòra,
xe co te gavesse copà to popà, to nono, la to storia,
el to pan cotidian, la to memoria.