Servizi
Contatti

Eventi


Vagabunnu di la notti

Una raccolta densa di immagini icastiche, impreziosita da perle poetiche; versi che si leggono col piacere di imbattersi in fresche e bucoliche trasfigurazioni (Unica armunìa / lu to sciatu / ca mi fa di capizzali (…) Chianciu lu jornu / ca lu me ciriveddu / nun po’ chiù sfurnari / vasteddi cavuri cunsati / cu l’ogghiu di la fantasia (…). “Vagabunnu di la notti” è la terza raccolta di poesie di Ermanno Mirabello, nativo di Palermo, anno 1949, ex dirigente tecnico presso l’Ispettorato Forestale.

Nidi di palori

Tornu ‘nta lu violu
dunni palori ‘ngialinuti
straminati a lu ventu
di la ‘nguscia
pigghanu volu
a lu sciusciu di la fantasia.
Tornanu
supra l’arvilu di la poesia.
Chi festa!
L’aceddi
ricumincianu a virsiàri
consanu nidi di palori
cuvanu pinseri
sprivulazzati d’amuri
e cu li primi pinni
volanu
‘nta lu celu di lu cantu.
Pueta aeri
pueta oj
pueta dumani e sempri.

Notti senza sonnu

Notti senza sonnu
ad ascutari lu silenziu
ca grida lu to nomi
assicutannu
animi spirduti
di pinsera vagabunni
ca mi portinu a tia.
Ti viu
Darreri unni di cristallu
Ca si sfascianu supra li ricordi
Sfardannu lu cori.
Aspettu
‘mmennzu inutili spiranzi
aggiummariati di silenziu
cu lu pinseru ti parru
cuntannuti siccagni jorna
e notti ca nun finiscinu mai.

Vagabunnu di la notti

Na ùccia d’acqua
martiddìa lenta rintuzzannu
a la campana di la matrici.

Li atti addisiànu amuri
chianciulìanu supra li tetti
mentri cani sulituari
nta li campagni
lupìanu a la luna.
Tu
durmennu la paci
comu un puddicinu
sutta l’ala di la ciòcca
ti nni stai aggiuccata
a lu me latu
e li me vrazza
ti fannu di sciallu.

Iu
Vagabunnu di la notti
jettu lu rizzagghiu
‘nta lu mari di la fantasia.

‘Nta la menti smaniùsa
comu acqua ca vugghi
sdùnanu timpesti e favuli
livannimi lu sonnu.

Supra lu me tettu
via vai di zocculi
percia lu ciriveddu
e seggi arrunzati
arrizzanu li carni.
Unica armunìa
lu to’ sciatu
ca mi fa di capizzali.

Recensione
Literary © 1997-2022 - Issn 1971-9175 - Libraria Padovana Editrice - P.I. IT02493400283 - Privacy - Cookie - Gerenza