Servizi
Contatti

Eventi


Eventi primi

Davanti a sto ultimo libro de poesie in italian de la padovana Lucia Gaddo Zanovello, dopo averlo leto, confesso che me sento inpapinà. Son estasià da la belezza de i testi, da l’eleganza del linguagio, da i colori de le imagini, da la profondità de i argomenti. Resto – lo ripeto – inpapinà parché no riesso a catare le parole adate, da scrìvare in dialeto, par dire quelo che vorìa dire, par manifestare tuta la me amirazion per la “pienezza di pensiero”, per l’originalità “del pensato, intuito, vissuto”, per la teoria filosofica del tenpo, per la tenerezza de la luce che ilùmina le parole.

Parole piene de storia, de memoria e de futuro, come se el presente – e ghe ne condivido l’idea – no ‘l fusse gnente, gnanca l’esistesse: in tal senso l’autrice definisse “eventi primi” tute le robe che càpita a ogni individuo e che magari uno no ‘l ghe bada, quando, al contrario, i sarìa segni “indicativi”, utili e oportuni par andare avanti o par sognare de andare avanti.

Quindi Eventi primi (Macabor Editore, prefassion de Bonifacio Vincenzi, magio 2017, pag 132, euro 12,00) corisponde al tentativo de colegare i vari momenti de l’esistenza, vista co i oci privilegiati del poeta.

La cara Lucia me perdonarà se no son riussìo a ilustrare el so splendido capolavoro.

Recensione
Literary © 1997-2018 - Issn 1971-9175 - Libraria Padovana Editrice - P.I. IT02493400283 - Privacy - Gerenza