Sebastiano Schiavon, lo “lo strapazzasiori”

La vita curta assè (1883-1922), stracolma de inpegno e de sfortuna, de sto "strapazzasiori" padovan, la ghe xe stà slongà in te un libro scrito da Massimo Toffanin

El libro che parla de sto leader catòlico che, a i inissi del ’900, ga dà corajo al mondo rurale padovan par la so òpera sociale e polìtica, el xe la conferma de cossa se pol realisare, utilisando la propia inteligenza, la curiosità, la grinta e la voja de fare.

Questo xe el caso de Massimo Toffanin, autore de sto capolavoro stòrico-biogràfico, risultato de ani de ricerca in tute le direzion, parché de sto personagio se ghe ne gavéa perso le trace e quasi la memoria. L’autore el saveva che eljera stà el nono de so mojere e che ’l se jera inpegnà nel mondo catòlico vèneto. Sicome un bon diretore de banca − profession de l’autore − el capisse a naso se un cliente mèrita fiducia e intaresse, Massimo Toffanin el ga capìo al volo che el lontano... "parente" meritava de èssare fato conóssare, e che l’inpegno sarìa stà ripagà da quelo che se pole ciamare "successo".

Partìo da un bilieto da vìsita che conpagnava un libro invià nel ’71 a la fiola Lia, da parte del sen. Stanislao Ceschi, e da un archivio comunale distruto da un bonbardamento nel 1944, el ghe n’à rumà del chel poco de carte. El ga tastà el gusto de la pólvare ne i Archivi: parochiale de Roncaja de Ponte S. Nicolò e de S. Pietro de Camposampiero, de la Biblioteca del Seminario vescovile de Padova, de l’Università de Padova e de Ferrara, de la Prefettura, de la Curia Vescovile de Padova, del Casellario Politico Centrale, de l’Aministrassion Provinciale, del Comune de Saonara e Legnaro, in quelo Segreto del Vaticano, in quelo Storico de la Camera de i Deputati de Roma, del Ministero de l’Industria, de l’Azione Cattolica Italiana, de la F.U.C.I. e de mezo sècolo de giornài tra quoti-diani e setimanali catòlici.

Questo, par dare un'idea de qualo pole èssare stà l'inpegno de Toffanin, par rivare a un risultato che mèrita tuta la nostra amirassion.

L’òtima realisassion editoriale (Ed. "La Garangola", Padova, 2005, 256 pag., euro 20, in prima de copertina un’opera a ojo de Enrico Schiavinato), xe in-pressiosìa da le note de la Provincia de Padova (presidente Vittorio Casarin e assessore a la cultura, Massimo Giorgetti), de i Comuni de Ponte S. Nicolò e de Legnaro, da le presentassion de Giampaolo Romanato de l'Università de Padova e de Ermenegildo Reato de l'Istituto Ricerche Storia Sociale e Religiosa de Vicenza.

Disemo però, ’desso, chi che ’l jera sto zóvane de ùmili origini, soranominà "strapazzasiori", parché el difendeva i diriti de i contadini e de la pora gente.

Sebastiano Schiavon el nasse el 28-5-1883 a Ponte S. Nicolò (PD) da na fameja modesta; nel 1895 el vien iscrito al Seminario vescovile de Padova, dove el frequenta sinque ani de ginasio e tri de licèo; nel 1903 el se iscrive a l'Università; nel 1907 el se laurea in Létere e el taca a insegnare; nel 1908 el deventa segretario de l'Uficio Catòlico del Lavoro; taca i primi siòperi in provincia de Padova; nel 1909 el se sposa; continua i siòperi, el va soto processo, a Cittadella el fonda la lega de i contadini con a Padova l'Uficio de colocamento; nel 1910 el fonda el "Sindacato veneto tra i lavoratori della terra"; nel stesso ano el vien eleto Consigliere provinciale a Padova e ne i Comuni de Saonara, Ponte S. Nicolò e Legnaro; sùbito el deventa conferenziere de l'Unione popolare e el se trasferisse a Firenze; nel 1912 el orienta i so inpegni polìtici verso Padova; nel 1913 el vien eleto Deputato al Parlamento; nel 1914 el fa parte del grupo de i "cattolici-deputati", el vien rieleto Consigliere in Provincia e ne i stessi tre Comuni; nel 1915 scopia la guera e Schiavon se schiera con i "Comitati di preparazione civile"; nel 1916 el vien riciamà soto le armi, ma ne la primavera del 1917 el vien riformà; in Parlamento el se bate a favore de i 100.000 profughi del Veneto e per i aiuti a le fameje de i soldà e le pension de i militari morti; prima de la fine de l'ano el va stare a Corbola; nel 1918 el se prepara a fondare con altri el Partito Popolare Italiano che nasse el 18-2-1919; poco dopo el vien eleto diretore de l'Uficio del lavoro a Padova e, a fine ano, el vien rieleto deputato; nel 1920 el ga l'incàrico de Presidente de Giunta per le petizioni; continua i scontri tra leghe rosse e leghe bianche, el scomissia a vegnere contestà, no ’l viene rieleto in Provincia e gnanca al so paese; nel 1921 no ’l xe pi ben visto gnanca da la Curia padovana; par le elession polìtiche de magio el tenta de fondare un partito, ma no ’l riva in tenpo; el deventa ispetore del giornale "Il popolo veneto"; el 30 genaro del 1922 el more a Padova.

Da la storia del protagonista salta fora le vicende del teritorio padovan e de l'Italia ne i primi vint'ani del secolo passà. Quindi, el lavoro serio, puntuale e sientìfico de Massimo Toffanin el porta un enorme contributo non solo a valorizare na persona, ma a ilustrare na parte de storia de la nostra gente, metendo in risalto come se possa avere na fede religiosa e insieme na fede polìtica, purché al centro del pensiero e de le azion ghe sia senpre l’omo, preferibilmente quelo più bisognoso de aiuto e con i so diriti da difèndare.

Na roba che fa star male la xe quela che se incontra, lesendo el "Discorso- Programma agli Elettori" del Prof. S. Schiavon, del 12 otobre 1913: i problemi religiosi e morali, de tutela de la scola privata catòlica, del poco intaresse per l’agricoltura, del rispeto per le idee de i altri, de l’assistensa sanitaria e de le pension, del comercio de i prodoti, de la riforma tributaria... dopo quasi un secolo i xe oncora i stessi!

In quarta de copertina, sara sto "ritrato" storico na intensa, devota, luminosa dèdica lirica de la poetessa Maria Luisa Daniele Toffanin, nevoda de Sebastiano Schiavon.