Ne la colana "Serie avorio" de la Nuova Tribuna, xe vegnù fora la racolta de poesie in lingua L'abbraccio dei colori (Venilia Editrice, Mintemerlo, pref. de Stefano Valentini, nota de Elvio Guagnini, ilustrazion de Pierangelo Villani,) de la padovana Gabriella Villani, insegnante de materie artistiche, critica d'arte, scritrice, giornalista e Presidente de la Comissione Pari Opportunità del Comune de Padova.

In sta poesia parla el cuore de la dona, sìnbolo naturale de ogni tipo de amore: sentimento puro, afeto sincero, passion viva, dolore profondo, sogno intenso... par continuare a vìvare. Par questo, el libro xe el resoconto de un tòco del viajo de l'esistenza, vissùa, come senpre sucede, a l'aria aperta, soto 'I sole o a la piova, al caldo e al fredo, al ciaro e al scuro, co la festa nel cuore o le làgrime ai oci, nel clima de la gioia più granda o de la delusion più invasiva.

Cussì la poesia de Gabriella Villani la deventa un discorso con se stessa, un diàlogo sincero, caldo, penetrante, co la propia anima e con un "tu" che no ga bisogno de èssare identificà, parché – miracolo de questa poesia – ogni letore deventa un "tu", se sente specio so 'I quale se riflete stati d'animo, slanci d'amore, delusion, entusiasmi, ricordi, scoramenti, interogativi, paure, sensazion e pensieri, tanti pensieri, alti, maturi, comunicativi e istintivi parché sinceri.

Su tuto dòmina el colore, spanto ovunque, legero, diluìo tra le parole par bevarare le tante imàgini che fiorisse nel giardin de na musicalità incredibile. Parole che casca so'l folio come le righe de na piova marzolina, a ricamare l'aiola de un sogno dai mille colori. Un sogno "vero", come questo de Gabriella Villani.