Per colli e cieli insieme…

Musica, fede e poesia

Cò la càpita a Vicensa a saludar i amissi de la “Scaletta 62” de Santa Lussia, la ne incanta tuti co ‘l so soriso spontaneo e ‘l so modo de fare. A te vien naturàe, vardàndola, métar da parte chel fià de sogession che dà el so nome: Maria Luisa Daniele Toffanin. La conosso da coalche ano e ve posso ‘sicurar che la xe na poetessa dal bon gajarda, de quele che riesse a far spanir maraveje da i versi, smissiando on stile classico e moderno insieme. Sta gran dona, la ruma premi dapartuto, grassie a sta capassità poetica e a la so sensibilità particolare.

Qualche tempo fa, la ga nunsià ai amissi che la gavarìa presentà, de lì a poco, uno de i so libri: “Per colli e cieli insieme mia euganea terra”, versi che inpitura e fa slùsare, de amore e de fede, la tera magica indove che la vive, i Coli Euganei. E xe stà a Palasso Leoni Montanari, uno de i edifissi baròchi pì bèi de Vicensa, edificà ‘te i primi ani del ‘700 da sta fameja de bacanoti, so ‘l posto indove i gaveva on laboratorio par filar la seda, che ‘l 7 de marso passà, col patrocinio de Banca Intesa, se ga tegnù l’incontro de poesia e musica “Insieme nell’Umano e nel Divino”, indove che se ga catà a presentar i so versi la Maria Luisa Daniele Toffanin e Padre Norberto Villa O.B.S., Abate de Praglia.

Ga fato da introduttore Renzo Pegoraro, on prete de Padova, laureà Dotore ‘ncora prima del ’90 e che ga tante de quele qualifiche da restar lì, inbaucà. A mi parò el me ga piasso, perché ‘l ga parlà co entusiasmo, conpetensa ma anca senplissità, de sti nostri do bravissimi poeti. E no la xe miga finìa. A lèsar xe stà ‘n’ atore e regista amatoriale, Federico Pinaffo, altro personajo de quéi che projeta, parla a la radio, tien corsi de formassion par on fraco de robe e, quelo che pi me faséa vegner le sgrìsole, con a vosse che faséa spanire dal core mile emossion…

Lassème che continoa: de fianco ai protagonisti de la serata, do musicisti sensassionali ne ga regalà de le note da fàvola, par piano e flauto. A scoltarli, a ve ‘o confesso, me vegnéa i oci lustri: al pianoforte, don Paolo Maria Censori, on pretin che, dal 2003, xe deventà ‘nca elo monaco a Praglia e al flauto na zovaneta, la Nicoletta Zannoni, che la insegna musica ‘te diverse scole de Padova. E tute ste pressiosità, zontà a la sala splendida de le Galerie de Palasso Montanari, ga fato soasa par “La mia barca è una conchiglia” – Piccolo salterio del duemila de l’Abate Norberto Villa e par “Per colli e cieli insieme mia euganea terra” de la nostra Maria Luisa Daniele Toffanin, insegnante par tanti ani e che ‘te le scole la ga anca dà vita a momenti de poesia co i tosi.

I versi del so libro i paréa rivare tante volte a na spiritualità che ben se sposava co i Salmi de l’Abate. Par farla conpìa, ‘te la saleta lì rente, jera stà verta al pùblico na minimostra de pressiose icone so ‘l tema de l’Anunciassion ‘te l’Oriente Cristiano: “Un filo rosso tra le dita”.