Musica, fede e poesia
con Maria Luisa Daniele Toffanin
e Norberto Villa

Có la càpita a Vicensa a saludar i amissi de la "Scaletta 62" de Santa Lussia, la ne incanta tuti co 'l so soriso spontaneo e 'l so modo de fare. A te vien naturàe, vardàndola, métar da parte chel fià de sogession che dà el so nome: Maria Luisa Daniele Toffanin. La conosso da coalche ano e ve posso 'sicurar che la xe na poetessa dal bon gajarda, de quele che riesse a far spanir maraveje da i versi, smissiando on stile classico e moderno insieme. Sta gran dona, la ruma premi dapartuto, grassie a sta capassità poetica e a la so sensibilità particolare.

da sx: don Renzo Pegoraro, la poetessa Maria Luisa Daniele Toffanin e padre Norberto Villa abate del Monastero di Praglia (Padova).

Qualche tenpo fà, [7 marzo 2009] la ga nunsià ai amissi che la gavarìa presenta, de lì a poco, uno de i so libri: Per colli e cieli insieme mia euganea terra, versi che inpitura e fa slùsare, de amore e de fede, la tera magica indove che la vive, i Coli Euganei. E xe stà a Palasso Leoni Montanari, uno de i edifissi baròchi pì bèi de Vicensa, edificà 'te i primi ani del '700 da sta fameja de bacanoti, so 'l posto indove i gaveva on laboratorio par filar la seda, che 'l 7 de marso passa (2009), col patrocinio de Banca Intesa, se ga tegnù l'incontro de poesia e musica Insieme nell'Umano e nel Divino, indove che se ga catà a presentar i so versi la Maria Luisa Daniele Toffanin e Padre Norberto Villa Obs, Abate de Praglia.

Ga fato da introdutore Renzo Pegoraro, on prete de Padova, laureà Dotore 'ncora prima del '90 e che ga tante de quele qualifiche da restar lì, inbaucà. Ami parò el me ga piasso, parché 'l ga parlà co entusiasmo, conpetensa ma anca senplissità, de sti nostri do bravissimi poeti. E no la xe miga finìa. A lèsar xe stà 'n' atore e regista amatoriale, Federico Pinaffo, altro personajo de quéi che projeta, parla a la radio, tien corsi de formassion par on fraco de robe e, quelo che pi me faséa vegner le sgrìsole, co na vosse che faséa spanire dal core mile emossion...

da sx: don Renzo Pegoraro, la poetessa Maria Luisa Daniele Toffanin e padre Norberto Villa abate del Monastero di Praglia (Padova).

Lassème che continoa: de fianco ai protagonisti de la serata, do musicisti sensassionali ne ga regalà de le note da fàvola, par piano e flauto. A scoltar4i, a ve 'o confesso, me vegnéa i oci lustri: al pianoforte, don Paolo Maria Censori, on pretin che, dal 2003, xe deventà 'nca elo monaco a Praglia e al flauto na zovaneta, la Nicoletta Zannoni, che la insegna musica 'te diverse scole de Padova. E tute ste pressiosità, zontà a la sala splèndida de le Galerie de Palasso Montanari, ga fato soasa par La mia barca è una conchiglia - Piccolo salterio del duemila de l'Abate Norberto Villa e par Per colli e cieli insieme mia euganea terra de la nostra Maria Luisa Daniele Toffanin, insegnante par tanti ani e che 'te le scole la ga anca dà vita a momenti de poesia co i tosi.

I versi del so libro i paréa rivare tante volte a na spiritualità che ben se sposava coi Salmi de l'Abate. Par farla conpìa, 'te la saleta lì rente, jera stà verta al pùblico na minimostra de pressiose icone so 'l tema de l'Anunciassion 'te l'Oriente Cristiano: Un filo rosso tra le dita.

"Tuti i Salmi finisse in gloria", diséa la mama; e anca chel giorno, godù fra musica, fede e poesia, l'è 'ndà... A la Marisa parò va el me "grassie", per 'verme regalà sta bela ocasion.

La sala delle Gallerie di Palazzo Montanari a Vicenza.

foto © 2009 by Cav. Igino Stella